Höfi Foto.jpg

ÜBER ÜS

 

Dr Fridu u der Höfu hei im 2020 ä Bier-Idee gha:

"Chumm mir braue üses eigete Bier"

Da äm Höfu si Chef scho sit Johre duet braue u mir fo Tute u Blase kei

Ahnig vom Braue hei gha, heimer dr Dougi (Höfus Chef) a gfragt, ob mir nid einisch äs Bier bi ihm chönni cho braue.

Är het de relativ schnäu einisch Zyt gha u mir hei bi ihm chönne go luege oder besser gseit, üses Erschte Bier chönne go braue. Vorab heimer äs Rezäpt use gsuecht u am Dougi übergäh. Är het de ömu no chli Sache müesse a passe. D.h. er het nid aue Mauz gha, wos dr für hätti brucht.

So het är nis ä Alternative vorgschlage. U so heimer das zämä i me ne Tag ömu chönne braue.

Näbebi:  ds "Erschte" braue mir gäng no :-)

Öppe 2-3 Wuche spöter, simer no einisch zum Dougi. Itz isches ums abfüue gange. När heimer öppe grad 2 Harasse-Bier mit hei gno. U scho wieder mues me warte. Dä Choge sig ersch i 2-3 Wuche guet, hetis dr Dougi gseit.

Okey, mir müesse eh no ä Name für üsi zuekünftigi Braueiei ha. Zudäm

muess jo üses Bier ou no ä Name u ä Etigette ha.

Fridu u dr Höfu si du relativ schnäu uf ä Name "Damm-Brauerei" cho.

Wär ds Rüegschbach u ir Umgäbig wohnt, weis wieso mir dä Name hei gno :-).

Dr Name vom Bier isch eigenlech ou grad schnäu gfunge worde. Eh, das isch üses 1. Bier, de söu das ou ds "Erschte" heisse. Druf abe heimer a gfange d Etigette drfür ds entwärfe. Ds Resultat gset dr unger "Üsi Bier".

Nach guet 3 Wuche heimer dä Saft probiert. Potz Tuusig, dä Cheib chame jo no trinke, nei das Wässerli isch sogar dr Hammer.

Do het dr Fridu u dr Höfu natürlech ds Brüschtli gsteut.

Kei Wuche spöter heimer ds ganze Equipment im Internet bschteut.

U rund 4 Wuche spöter heimer das Säftli ds erscht mou säuber braut.

Bis ändi Johr heimer ömu scho gägä 10 verschidni Bier braut.

Fridu & Höfu

KONTAKT

 

Weder einisch wetit cho probiere, de schribet üs doch hurti äs Mail mit däm nachstehende Formular.

Danke für die Nachricht!